1.2 Shlagbaumsiz temir yo'l kesishmasi

Nimani bildiradi

Oldinda shlagbaum bilan jihozlanmagan temir yo'l kesishmasi borligidan ogohlantiradi. Kesishmada shlagbaum yo'q, shuning uchun haydovchi yaqinlashib kelayotgan poyezd yo'qligiga ayniqsa e'tibor berishi kerak.

Qayerga o'rnatiladi

Aholi punktlarida xavfli joydan 50–100 metr oldin, aholi punktlaridan tashqarida esa 150–300 metr oldin o'rnatiladi. Zarur hollarda boshqa masofada ham qo'yilishi mumkin — u holda masofa belgi ostidagi 7.1.1 «Obyektgacha bo'lgan masofa» qo'shimcha belgisida ko'rsatiladi. Xavfli qismning uzunligi 7.2.1 «Ta'sir oralig'i» belgisi bilan ko'rsatilishi mumkin.

Aholi punktlaridan tashqarida bu belgi takroran o'rnatiladi: ikkinchi belgi xavfli qism boshlanishiga kamida 50 metr qolganda qo'yiladi.

Haydovchi nimaga e'tibor berishi kerak

Temir yo'l kesishmalarida va ularga 100 metrdan kam masofa qolganda quvib o'tish taqiqlanadi (YHQ 86-band).

Temir yo'l kesishmalarida qayrilib olish taqiqlanadi (YHQ 62-band).

Kesishmadan keyin tirbandlik bo'lib, haydovchi kesishmaning ustida to'xtab qolishga majbur bo'lishi mumkin bo'lsa, temir yo'l kesishmasiga kirish taqiqlanadi (YHQ 118-band).

Manba: O'zbekiston Respublikasi Yo'l harakati qoidalari, 1-ilova «Yo'l belgilari».